第3口針

今日阿MO卒之打完第3枝防疫針, 大功告成, 如無意外, 一年後再見DR. MAGGIE, 之前提過阿MO由到我家到今時今日, 都有打噴嚏的毛病, 呢個係佢遲遲未打哂防疫針的原因, 而且呢兩日見佢打噴嚏多左, 所以見醫生時, 又再問清楚, 醫生話如果D鼻水是清的, 不是黃同綠是沒有問題, 可以由得佢!

我問醫生阿MO絕育後胃口差左, 以前食開D乾濕糧都唔太食, 但係比D新糧佢, D胃口又番嚟, 阿醫生話如果佢鍾意貪新鮮, 好過剩係鍾意食一款糧, 所以有需要的話可以幫佢轉糧!

我又問阿MO有時好惡死, 佢小姐心情唔好時, 摸下佢都會咬人, 愈NO愈咬牙切齒, 阿醫生話佢睇得出, 佢話如果用NO冇用, 要用"池池"聲嚇佢, 因為佢阿媽都係咁, 同埋佢頸後有一個凹位, 如果按下去可以令貓貓靜止, 如果都係唔聽話, 可以用噴水壺噴一些水牠的臉上, 因為牠的媽媽有時教小貓時, 會用口水噴濕小貓的臉!

我有我地講, 阿MO由醫生張診症枱走到醫生張電腦枱, 仲想企上部NOTEBOOK上, 當醫生想幫佢打針時, 佢居然兇阿醫生, 阿MO真係失禮人!

另外DESEX後, 醫生話阿MO個傷口埋得好靚, 不過入面腫了一舊, 可能係佢太活躍, 引致傷口有D組織走左出來腫起左, 不過佢話個會自己好番, 亦可以唔使理!

阿MO重得好慢, 我第一次見佢, 佢唔夠兩個月大, 都有1.29KG, 而家5.5個月大, 得2.52KG, 即5磅半, 好輕咁!

呢張相, 阿MO望落去好肥....肥婆MO

阿MO, 你都瞓得好危啫!!!

前晚MO爸同阿MO對峙, 其實係MO爸想抱阿MO, 阿MO咬MO爸, 愈NO愈咬, MO爸見阿MO咁惡, 就更加要抱佢, 卒之各不相讓, 阿MO手腳抱住MO爸的手, 跟著咬咬咬, 不過只係大力印落去, 但呢個行為絕對唔要得, 後來阿MO跳上枱, MO爸站到枱前, 阿MO採取動我不動, 但毛髮直立, 耳朵向後, 當MO爸欲上前摸一摸阿MO, 阿MO立即出手還擊, 總之係好惡好惡! 卒之....MO爸認輸了.....!  是夜, 阿MO唔比人掂...直至有人請佢食零食,  牠的節氣無存, 跟著某人咪咪叫, 任摸任抱, 即時令我想起國產零零7某片段!

但零食過後, 牠又還我本色, 我摸佢又咬我, 但我冇阿MO爸咁仁慈, 所以將佢困了在廚房兩個小時先放出來!

貓醫院打針: $300診金 + $30針 = $330

浮動月費

早已聽聞pccw的上網費, 電話費好浮動, 有d人好貴, 好似我咁, $155得3M, 電話月費要$110, 咩都唔包, 其實係STANDARD月費, 不過真係有D人可以平好多, 最近HKBN在我住的大廈拉了線, 我已急不及待終止PCCW, 轉用HKBN, $99有100M真的很吸引, 簽30個月還有6個月免費, 加埋全套家居電話服務都係加$30一個月!

本來月頭已約人安裝, 但可惜因為前業主將原電話線位置改動, 電話插頭的不是原裝電話線, 所以需要拓牆找回原裝插頭, 才可以用HKBN, 所以惟有放棄安裝, 待裝修時才一次過整!

因為沒有寬頻合約在身, 打回PCCW要求給與一個較好OFFER, 和不同職員傾過電話, 有些堅持$16X一個月6M, 超差OFFER, 最後遇到一個SALES給與我平均每月$121有6M, 要簽18個月約, 這個可以考慮! 還有一個8M的PLAN, 是$190一個月, 24個月約, 4個月FREE, 惠康禮券$300, 平均$146! 包USB手指, 每月5天EVERYWHERE免費上網!

早幾天又交表準備CUT 家居電話, 之前問過續約OFFER, 最平都要$66一個月, 24個月約, 包CALL WAITING及來電顯示, 交表後收到PCCW的電話, OFFER我$88一個月, 簽一年約, 有6個月免費, 即平均$44一個月, 什麼也不包, 居然和我原本的PLAN相差$66一個月, 什麼世界?如果我不CUT電話線的話, 便一直繳交$110一個月電話費! 簽約後幾天, 再增取到包來電顯示和call waiting, 但要簽18個月約, 免9個月, 每月都是$44! 聽聞坊間可再增取$180超市coupon, 即平均價$34, 這個我放棄了!

後來我又問職員, 上網月費,有什麼OFFER, 他說如果我住的大廈有HKBN覆蓋, 便可以OFFER我$198一個月, 包8M上網, 家居電話全套服務及EYE2無線電話, 要簽24個月, 我覺得可以考慮下, 點知佢話check左佢地internal record, 我住的大廈沒有HKBN覆蓋, 就算我叫佢上HKBN個網頁CHECK下, 佢都堅持說未覆蓋, 佢仲話HKBN講大話, 其實未拉線!

其實6月頭管理處已經張貼通告說HKBN安裝工程將會6月尾完成, 完工後7月便做TESTING, 而8月頭樓上已經有幾個單位成功安裝了, 但那個所謂PCCW的SALES根本不理我說什麼, 硬要說HKBN未入線, 我心想, 可能他比了個OFFER又想反口, 所以開眼講大話, 無論我點講, 佢都話因為HKBN未覆蓋, 所以比唔到個OFFER我, 佢居然叫我試下叫HKBN來安裝, 到時收唔到, 就知佢冇講大話, 我話到時安裝左, 就唔會再搵番PCCW, 呢個SALES好倒米!

我都有想過拓牆找回原裝插頭, 不過先要花數百至一千, 好似不太抵, 現在惟有等PCCW果位所謂SALES搵工程人員CHECK下, 究竟HKBN是否真的入了線才覆我有冇那個$198的OFFER, 講真, 那個OFFER不太吸引, 不過老公說多得1M得1M, 我便等下啦, 鬼叫上手業主改過位咩!

後來再打去網上行CUSTOMER SERVICES問那個$198PLAN, 那位小姐說我可以用那個PLAN, 而她亦沒有解釋為什麼之前那個職員點解話我冇HKBN, 所以不給予那個PLAN!

跳舞姿勢

呢兩日睇新聞, 令心情好沉重, 好在番到屋企見到阿mo, 好似多左個小朋友係屋企咁, 可以暫時放低一d唔開心嘅事! 平時放工, 阿mo會好似狗仔咁係門口歡迎我, 同lam我的腳指, 但今日佢攤係度瞓, 冇哂儀態, 話哂你都係女仔, 咁open, 不過你個姿勢又幾有型, 好似跳芭蕾舞咁!

呢張相又似番淑女哪

微粒好粗呀, 因為用3年前手提電話拍的, 質素係咁上下LU

寵物玩具

網上訂了枝激光筆比阿mo玩, 佢鍾意到傻左, 係咁追住d光, 一枝筆可以照出5種圖案, 只係$25, 真係又抵又好玩!

又買左個寵物袋, 阿mo第一時間走入去, 好似唔捨得出番嚟咁, 個袋只係$90, 抵抵抵!

http://www.patsoexpress.com/

阿MO五個月哪

有朋友話我養左隻貓之後忙左好多, 可能阿MO初到我家已經病病地, 所以我特別留意佢D舉動, 又諗一D方法令佢開心D,  總之係想佢快D長大, 增強抵抗力, 第一次見阿MO時, 都唔夠兩個月大, 今日佢已經足5個月哪, 身體狀況亦告穩定, 佢個樣雖然冇初初時咁得意, 而且臉上仲多左一D布偶貓的黑紋, 但係我覺得佢英左喎!總之, 你變成點, 我都咁鍾意你嘅!

唔夠兩個月嘅阿MO

最近買左個有蓋貓砂盤比佢, 未放砂之前, 佢居然將個砂盤當左床, 日日都瞓係入面, 見佢瞓得咁SWEET, 所以我都由得佢當床瞓!

人生大事

對於貓貓來講, 人生大事, 唔係結婚生仔, 就係做desex, MO小姐亦唔例外, 兩個星期前預約左尋日去上環貓醫院的Dr. Maggie幫阿MO做絕育, 好似早左D, 因為阿MO仲差一個星期先夠5個月, 不過曾聽某些人講, 最好係佢發情之前做, 因為佢仲未識性, 冇咁唔開心, 而據某些專家來講, 16周便可做DESEX, 當然, 要經過醫生的檢查!

護士小姐叫我前一晚12時後, 唔好再比野佢食, 但可以飲水, 阿MO當然唔知發生咩事, 前晚仲食剩野, 我心諗你之後仲要餓足全日, 真係可憐!

尋日阿MO一早喵喵叫等食, 當然係唔可以比野佢食啦, 仲要引佢入寵物袋, 其實我都有D想縮沙, 難得佢呢排咁開心活潑, 無啦啦要佢開一刀, 不過開刀都係遲早問題!

約左10:30, Dr. Maggie話阿MO好健康, 我話佢每日都會打一兩個噴嚏, 佢話只係敏感, 又讚我地又比乾糧同濕糧佢食, 不過不建議日常用洗耳水倒入耳仔幫貓貓洗耳, 因為貓貓耳道好窄, 有D水入左出唔到, 所以話平時可以用清水加化妝綿清潔就OK了!

Dr. Maggie 見阿MO耳仔外殼有D傷口, 佢開左枝藥膏比佢, 我諗係佢抓耳抓傷, 不過阿醫生又冇話佢有耳蝨!

檢查完畢, 護士小姐叫我地5點來接留阿MO, 卒之4:45PM, 護士打比我話手術完成, 阿MO已經醒番, 係診所見番阿MO, 兩眼無神, 好似未瞓醒咁, 不過番屋企途中, 佢都有周身郁, 題外話, 我問護士小姐, 阿MO係咪要載頭COOL, 佢話唔使, 同埋貓載左好似比人定左型, 佢會好辛苦, 佢話貓貓平時一般清潔身體冇問題, 我問使唔使困籠, 佢又話唔使, 只要唔好比佢跳來跳去就得喎!

手術後殘樣阿MO

6PM, 番到屋企, 諗住阿MO會好肚餓, 點知佢望住D野食發呆, 又手軟腳軟, 連水都唔飲, 7PM, 佢開始食小小野, 仲勁飲水, 8PM, 佢已經食哂D乾糧, 仲食埋D濕糧, 9PM, 佢又開始做伸展運動, 想跳上電視櫃(!!!我好驚), 我唯有抱佢上去散下步!

10PM, 佢又企圖跳上飯枱, 我真係好驚佢會爆傷口,  為免佢再跳, 我唯有將佢放係籠入面, 佢就成晚係籠入面咪咪叫, 想我地放佢出來!

第2日朝早, 佢已經完全回復精神, 但因為我唔會將佢困籠, 所以要將屋企所有會向高空伸展的東西收埋, 佢又好似平日咁, 大字形咁係地下瞓, 阿護士小姐話個傷口得1CM, 但實情係1吋有多喎, 同埋個肚仔使唔使剪咁多毛呀, 豈碼有成4吋長, 好心痛添!

我搵Dr. Maggie做絕育的收費係.....$300診金 + $900 DESEX(貓女), TOTAL: $1200, 比普通診所貴, 不過我諗手勢會好D卦!  仲有, 愛協有$200資助, 不過我趕唔切申請, TOO LATE!

我係淑女

話說個幾月前, 我sent了一張相去樓下呢本雜誌其中一個專欄叫"眾生貓相", 只需填寫貓貓名字, 性別, 年齡等, 就有機會登你心愛貓貓張相在該雜誌上, 仲有貓小食送添, 我試下sent左張相比編輯部, 如果登出來, 可以留為記念, 都唔記過左幾耐....就收到佢地的e-mail問我有冇興趣提供mo小姐多一d資料, 登在另一個專欄叫"喵喵自白書"內, 卒之個幾月後今日, 我收到這間雜誌社寄來最新一期的書, 原來封面和內文都係講RAGDOLL, 唔知係唔係選中MO小姐的原因呢!

內文提到mo小姐外表好溫柔, 實質都幾惡死, 好似男親女愛果個Miss Mo咁, 這個我非常同意, 佢大小姐真係想點就點, 佢平時粒聲都唔出, 但近排鍾意半夜喵喵叫, 總之係要叫到我地起身開門為止, 但佢先四個幾月大, 應該冇咁快發情卦, 真係唔知點解, 尋晚仲攪笑, 半夜3點幾喵喵叫, 我起身比左d野佢食, 之後又番房瞓, 到4點左右, 佢又再叫, 我又出去睇, 佢好似狗仔咁, 咬住個公仔係個廳來來回回走來走去!

寵物用品展

這幾星期忙於上網訂購貓貓用品, 訂了好幾間, 卻遇到一間沒有交帶亦沒有時間觀念的店舖, 要求晚上6:30送貨, 但10:30仍然未收到, 真的氣死我!

與其上網訂貨受氣, 不如趁這幾天寵物展(30/7-1/8)走去睇睇, 不過真是很遠, 在亞洲國際博覽館, 好在有免費穿梭巴士, 我昨天在天后上車, 約一小時到達, 但回程卻遇著塞車, 要個多小時!

現場有很多狗狗四處行, 人又多狗又多, 我都不是太明點解那些主人會放他們的小狗在地上, 因為人太多, 很容易踏到牠們!

下面這隻虎紋的動物究竟是什麼?答案在最後一張相片

可能我第一次去寵物展, 在會場留了兩個多小時, 每一間店舖都看過好幾次, 因為山長水遠入機場, 總不可以空手而回, 所以買得過多了!

買了枝三文魚油給momo, 令牠毛髮好一點, 另外一枝本來想幫朋友代買的, 但因為當時找不到朋友, 買後先知道她已經有了, 現在唯有放上拍賣網低價拍賣!

$75/4oz (118ml)

又買了一些貓貓沖涼包,  100%天然, 不怕貓貓不小心吞了有損健康, 出面店舖賣$25-$30一包, 我一次買了一盒12包, 只是$170, 所以每包不用$15, 但又是那句, 真的又買多了, momo現在就連抹手仔都不肯, 所以幫牠抹身暫時比較困難, 所以多了的, 又要放上拍賣網了!!!

又買了有蓋貓沙盤, 只是$120, 又靚又平, MOMO把它當了避難所, 喜歡躲在入面, 不過牠有點豬, 入去後不太懂推門出, 在入面喵喵叫救命

下面是我買的東東, $800大元, 乾塘了

MOMO當然要第一個睇下佢D禮物

同場加映, MOMO自在反肚LOOK

這隻狗狗好似好可憐, 全白色比人漂成老虎紋, 但現場見, 其實是染得好靚, 不過我想牠未必會開心!

除了掛住貓貓外, 我都有自己生活的, 上星期日看了TOY STORY 3和潛行凶間優先場, 一定要有足夠精神才看Inception, 因為有點複雜, 但一定要看, 十分精彩!