去舊迎新

2010年對我來說, 好像不太順利, 家中各人或多或少都發生了一些不開心的事, 踏入最後一天了, 好像一切已經安定下來, 期望2011年家中各人一切平安, 可以開開心心的過日子!

今年大除夕, 我不再上街倒數了, 只和爸媽去了北角的『一點心』吃晚餐, 馬拉糕真的一讚, 而爸爸讚那個粥好得, 其他的合格啦! 4個人叫13個點心, 埋單約$220!

今年大除夕會和阿mo一起過, 一家三口, 感覺更加溫馨!

 

冇覺瞓

阿mo已經9個幾月, 牠同小時侯時差不多, 都是非常之活潑, 我好懷疑我放假在家的時間, 牠每日睡覺不足8小時, 總是走來走去, 又或者眼甘甘看著我們!

昨晚還讚阿mo好低調, 早上不會喵喵叫醒我們, 只會站在我的枕頭邊發出咕嚕聲, 但因為頗大聲, 也足以把我們吵醒!

別讚小朋友, 阿mo今早6時幾便喵喵叫, 當我們應牠後, 牠又一個急步飛奔到廳躲避, 牠想我們同牠玩捉迷藏, 結果當然是你有你叫, 我有我睡啦!太早了!

直至8時左右, 牠又喵喵叫想引我玩, 我不想掃牠興, 便和牠玩了一會兒, 好在家中可走的地方不多, 互追幾轉便玩完了, 最後牠又躲在梳化底, 平時牠會露條尾出來, 牠今次可以整個身子藏在梳化底, 我想拍下牠當時的表情, 所以便有下面這張相片了! 阿mo, 你超趣緻!

阿mo的全黑眼珠.........好神秘

阿MO新習慣

阿MO一向夜晚都唔會上床瞓, 但係自從今星期一開始, 佢每晚都會企係睡房門口, 房入面地下, 或者張椅度, 等我地抱佢上床, 佢自己唔會走上床, 係一定要我地抱佢, 仲要我地兩都都係房, 佢先可以安定落嚟瞓覺, 今星期之前, 就算最凍果幾日, 我地抱佢上床, 佢都係要走番去廳到, 所以同凍冇關, 我真係唔知點解, 貓可愛之處, 可能係你永遠都唔知佢想點, 一時一樣, 佢而家晚晚瞓係我腳邊, 其實都幾迫吓, 不過冇辦法, 好過佢天寒地凍瞓係廳中間, 我仲擔心佢冷親!

聖誕節目

今年平安夜是阿媽農曆生日, 自然地就陪爸媽出來吃飯, 去了北角的鳳城酒家, 樣樣食物都幾好喎, 特別係炸子雞呀, 炒生魚片呀, 樣樣都唔錯, 不過冇食蝦多士, 聽聞唔錯的, 下次一定再幫襯! 5個人埋單$680!

下面那個是弟婦送給媽媽的電話繩, 好靚呀!

今日下午去睇harry potter, 夜晚去吃hot pot, 聽日入元朗, 去親戚屋企新屋入伙, 後日去朋友屋企開christmas party, 三日假期fully occupied!

Merry X'Max

阿mo第一年過聖誕, 佢祝大家Merry X'mas!

一天人氣blog

因為打了一篇"高登炸雞", 今天變了人氣blog第60位, 瀏覽人數一日有963人, 不過只限一天, 因為已經將那篇blog變了私人blog了, 明天一切回復正常, 現將那版面留為紀念先!

這個冬天熱辣辣

筲箕灣東大街慢慢地變了食街, 很多外來人到東大街覓食, 今晚去試過另一間新開的食店, 新翠華本來開在銅鑼灣登籠街, 最近因為業主收樓, 所以搬了去東大街, 但身處在後街, 不太明顯, 這個死位, 開一間關一間, 早前李修賢開的米線店, 開不到一年就關門大吉, 現在再來一間吃煲仔飯的, 希望它可以生意興隆啦! 

order了兩個煲仔飯, 我喜歡硬飯, 所以好合我胃口, 而且味道也不錯, 冬天暖胃佳品, 希望可以keep到水準啦, 因為大部份食店質素一時一樣!

但對於坐位頗不滿意, 張枱固然是很小, 而且裝修有點臨時感覺, 好似放幾張枱就做生意咁, 可能老闆亦知此位置是死位, 所以試下反應如何, 不浪費太多金錢去裝修吧!

高登炸雞

最近幾hit的高登炸雞開左係屋企附近, 今日買來食, $9一隻雞全翼, $17兩隻, 雞扖$20一件, 炸粉薄薄脆脆地, 雞肉都算滑, 咸咸地幾好味, 下次試下雞扖先!

阿MO與冬天

阿MO是3月出世, 牠今年第一次過冬天, 我覺得呢兩日好涷, 我以為阿MO都係咁諗, 但佢都係晚晚瞓地下, 什麼床仔, 毛巾等等全部NO, 更不要說著衫, 夜晚, 我地刻意抱佢上床瞓, 但佢都係行幾行就落番床, 死都唔肯留耐D, 朝早佢又狂打噴嚏, 不過都係唔肯上床, 最多係瞓係地毯度, 我同事話阿MO係長毛貓, 所以佢地唔拍凍, 冬天反而好HAPPY, 因為佢隻長毛狗狗都係咁, 呢幾日出街開心到彈下彈下!

但係我好擔心佢會冷親, 好在佢伊家仲係精精靈靈, 但真係唔明點解佢咁憎瞓床仔或者一D軟綿綿的東東....佢最鍾意大字形瞓係地, 如果地下蓋上被或毛巾, 佢都會走開唔瞓! 唔通佢真係好熱?

貓咪101

終於有個電視節目專講貓貓, 第一集主要講一些熱門和特別貓種, 好似摺耳貓, 英國和美國短毛貓, 布偶貓和無毛貓等等! 阿MO睇得好入神, 可能電視內有好多貓貓走來走去! 有興趣者, 可以留意播放時間!

簡介~

你知道貓咪不斷理毛不是為了外表好看，而是因為這過分講究的清潔習慣其實對牠們的健康和舒適至關重要嗎？你知道貓咪天生就有從錯誤中學習改進的本能嗎？十二月，動物星球頻道的《貓咪101》將提供你關於貓咪朋友的趣味資訊，分為上下兩集的精彩節目將為大家詳細分析這種活躍嬉鬧、暴躁乖戾卻又可愛萬分的生物，以及牠們何以成為美國人最愛寵物的真正緣由。《貓咪101》將為觀眾介紹五花八門的貓咪品種、牠們的遺傳史、歷史上大名鼎鼎的貓咪與奇特怪異的貓咪資訊!貓的心意, 很難猜透, 從音調不同的喵叫聲到包羅萬有的睡眠習慣, 人類要了解貓咪的脾性實在不易。

動物星球頻道之 <貓咪101>

有線電視55台/NOW 210台/bbTV314台 , 13/12/2010及20/12/2010, 星期一晚上9時

韓國入貨

朋友剛從韓國回來, 順手幫我買了一些護膚品, 有innisfree的舊版Olive Cream, Olive Eye Cream,還有我的至愛Natural Breath Cream, 另外朋友推介雪花秀的Overnight Vitalizing Treatment, 這個可以當mask用, 啱哂呢個冬天, 不過呢枝要$270, total $600! 今晚會即刻試下個Overnight Vitalizing Treatment先!

某人找到一個方法去對付阿mo, 就係幫佢massage哪, 平時冇時停嘅阿mo, 當某人將佢好似抱bb般抱起放在膝蓋上,  一手托著佢個頭, 另一隻手輕按佢下巴, 阿mo就會變番一隻布偶貓, 用身放軟, 一動不動, 軟綿綿, 就好似布娃娃咁, 幫佢massage時, 佢個樣好enjoy, 咪埋眼咁, 同平時咬人嘅樣好唔同!

微博上癮

最近開始玩微博, 我知是遲了小小, 事源某人最近買了iphone 4, 而iphone與facebook及微博好似不能分割, 所以某人時常拍呀拍, 又放上微博, 總之就十分方便, 我雖然冇上網電話, 但也覺得幾好玩!阿mo係微博嘅主角!

今日番完church, 去左中環蘭芳園食lunch, 又真係幾貴囉!, 兩個撈丁餐加一個豬仔包要$90, 仲要成6個人迫埋一張細圓枱, 真係未食完, 已經想走哪! 係咪好好食? 不過不失啦, 因為坊間太多類似茶餐廳哪, 所以佢變得冇咩特別!

充滿生氣

這是阿mo招牌式手勢, 有時覺得佢真係好優雅,有時左踏右, 有時右踏左, 好隨意!

多了阿mo在家, 家中真的多了很多生氣, 因為牠很貪玩, 所以好像多了一個小朋友一樣, 亦多了很多歡樂氣氛!

早幾天門外走廊發生的事,雖然報紙沒有刊登,  但昨天終於知道了原因, 我在閉路電視看到的是事實, 而且原因不是出於自然, 始終是同一層樓層發生的事, 心理一定有影響, 可能說得有點隱悔, 不過真的不想講太多!

掛耳面膜

一向有用開我的美麗日記面膜, 一般補濕面膜,  不同功能的mask, 其實分別不大, 但價錢吸引, 而且很讚此品牌不斷增加新的味道及改良面膜設計, 昨天mannings特價$49買了一盒8塊「黃金膠原拉提美形面膜」，那種掛耳設計真的好user friendly, 令乾了的面膜不易掉下!

好番哪~~

今日阿mo隻眼好似平時一樣, 變番藍色, 不過如無意外, 聽晚我都會帶佢見下醫生, check清楚好d!

至於尋晚走廊發出果d怪聲, 仍然未知點解, 不過係閉路電視內見到有一班黑衫人(應該係政府人員)拎起擔架, 好似運一個人走, 是完全包住的, 其實有d似死屍!!! 又有警察出現???究竟發生咩事呢?

好轉中

阿MO尋晚半夜已經回復活潑本性, 今日隻右眼冇尋日咁紅, 但睇真D都係左右眼白兩隻色, 本來諗住今晚帶佢睇醫生, 點知醫生呢個星期都FULLY BOOKING, 聽晚我又要番學, 護士小姐問過情況, 幫我安排到星期5晚, 如果阿MO未完全好哂, 星期5晚都會帶佢去睇睇......!

今晚屋企走廊聽到有女人喊聲, 搬野聲, 男人聲, 但係始終聽唔到佢地講咩, 打開門睇, 又聽到個男人聲叫我地關門, 但係見唔到個人, 都唔知發生咩事, 維持左成個鐘頭, 阿mo好好奇, 成晚望出門口!其實我都好好奇, 打落管理處又冇人聽電話, 伊家又好似冇聲.....好奇怪!

尋晚阿mo又瞓係地, 當時隻右眼仲係好紅, 不過就精神左好多....

MO: 喂喂!阿邊個, 你仲咩偷影我?

酒吧內的婚宴

星期日晚參加了朋友的婚宴, 和平時的婚宴場地不一樣, 不是酒樓又不是酒店, 是一間德國酒吧, 除了酒外, 最出名是德國豬手, 酒吧內放了幾個特大的啤酒木桶坐位, 頗具特色, 而各款特色小食, 味道也可口, 當晚現場擠滿了賓客, 有的站著摸酒杯底談天, 又有些像我的坐著吃美食, 新郎新娘在賓客中穿插, 新娘換上婚紗敬酒, 好像參加了外國人的婚宴一樣, 很特別!

 

眼紅紅

阿MO今天可以睜開眼, 不過仍然眼紅紅,佢上次都係咁, 紅左3-4日先慢慢好番, 不過佢今次唔只眼紅, 仲冇咩心機, 悶悶不樂, 好在佢仲食得柯得, 不過玩嘅興緻就減半!

如果聽日佢都未見好轉, 我放工後就會帶佢去睇DR. MAGGIE, 最衰屋企附近冇咩醫生信得過, 始終睇DR. MAGGIE最放心!

MOMO, 你怎麼了?

MOMO, 你今晚怎麼了?為什麼睜不開右眼, 還在狂流眼水, 平時貪玩的你, 卻一動也不動, 沒精打采, 你是不是玩耍時撞傷了眼睛, 還是我幫你抹眼時整傷你? 看見你這個樣子, 我和貓爸也很心痛, 希望你休息一會後, 可以慢慢好轉!

突然想起, 原來你咬人時都幾可愛, 總好過你病病地沒精打采的樣子!

八卦樣

某人的iphone到手, 拍的第一張相片便是阿mo, wallpaper亦是牠, 阿mo的八卦樣好得意!

!

Yahoo的第一篇blog

我無聊下睇番在yahoo寫的第一篇blog, 是2006年7月23日的事, 主題是(牠有心事？), 當時未養貓, 但已經很喜歡拍牠們了, 足足4年幾, 其實在yahoo之前, 亦在另一個網頁有兩年的blog齡, 所以足足寫了6年blog, 它真的可以幫我記下很多很多生活點滴和回憶, 如果未來的5年10年, 仍然有blog的話, 我相信我仍然會寫下去!

 

弄MO為樂

阿MO真係一隻好WILD的貓貓, 用盡所有軟硬方法, 牠都是喜歡出口, 好似成為慣性, 有時我覺得佢好似獅子, 好想挑戰我地, 如果我地企圖用手按住佢, 唔比佢咬, 當我地一放手, 佢總係搵機會再咬我地, 佢仲會咬我地冇衫蓋住嘅地方, 例如如果著左牛仔褲的話, 佢就會咬腳眼位置!

阿MO雖然係布偶貓, 但佢只有7成布偶貓的特性, 佢心情好時可以任抱唔嬲, 但不高興時, 最好我地唔好掂佢, 免得自招麻煩!

自從夜晚開了房門之後, 阿MO每朝早, 都會走到我床上轉幾圈, 佢最鍾意(我最唔鍾意)就係, 踏過我枕頭, 在我頭邊走來走去, 有時仲停留一陣, 發出wu wu聲, 我知佢想我地起身倍佢, 因為佢已經悶左成晚, 所以我地係佢走過第3,4轉之後, 通常都會起一起身, 摸下佢再瞓過!

近排阿MO多左野講, 好幾次佢玩膠圈(個BANNER果個), 玩玩下個圈唔知去左邊, 佢就會走過來喵我幫佢搵, 搵到時, 佢又喵一下, 好似想多謝我咁, 跟住又再玩過, 但通常佢每一次玩膠圈都會整唔見5次或以上, 有時佢自己搵到, 搵唔到或者拎唔到時 佢先會叫我幫佢!

阿MO其實有D頭細身大, 特別係佢瞓係地下, 仲覺得佢個身肥肥地, 可能係多毛關係!佢平時勁鍾意大字型瞓係廳, 真係冇咩儀態!

 

除左掛住阿MO外, 呢個幾月無情情加入左炒iphone行列, 日日留意個回收價走勢, 真係好煩! 相差15分鐘, 回收價可以由$5,950跌至$5500, 真係嚇得心驚胆跳, 當然有錢賺是開心, 但係又唔想成日睇住佢上上落落, 好似買股票咁, 伊家剩低兩部, 放完就算! 某人因此賺左錢買左部iphone4! 我呢!仲係用緊3年前買果部電話, 未壞嘛, 好難說服自己買部新機, 但賺到錢夠交學費比一個讀保險的short course! 可以幫補下啦!

8個月哪

下星期一, 阿mo就8個月大, 我驚唔記得幫佢映相, 今晚映左先啦, 阿mo愈大愈得意, 有時望住佢, 真係覺得好開心, 佢都係咁貪玩, 總之我地拎起枝毛毛棒, 佢就好興奮!

而阿mo同我地又熟絡左好多, 所以愈來愈黐我地, 一家三口係床度大覺瞓, 所以真係好開心!

勁想玩個樣

銀行水浸

港紙愈來愈唔值錢, 而銀行的派錢行動又愈來愈積極, 之前申請左建行credit card, 3個月內簽$4800, 送$500超市現金卷, 網上申請仲額外送$100 GOVIDA現金卷!

而申請渣打白金卡, 首兩個月簽$4000, 又送幾款$500 COUPON, 任擇其一!

申請匯豐銀行信用卡的全新客戶, 網上申請, 兩個月簽賬或透支滿$4000, 更有$650現金簽賬額, 現有客戶亦有$450現金簽賬額, 八達通增值, 網上購物都計算在內! 如果唔想亂簽賬, 可以用現金透支, 即日在提款機拎$4000, 即日存番入銀行, 利息加手續費約$210左右, 扣除成本, 都有$440入袋, 免煩!

今日見到東亞銀行出招, 全新客戶(指過去6個月未曾用過東亞任何產品, 基本上是所有產品, 如信用卡, 戶口, mortgage, loan, 出糧, insurance等等), 申請至cute的聾貓credit card, 兩個月內簽賬或透支滿$4000, 送一套4張預付卡, 每張有$100, 類似八達通, 用完就冇, 網上申請兼全新客戶, 又多$250, total又有$650哪, 如果又用透支的方法, 成本比hsbc平一點, 約$190! 套卡真係好靚!我都想要!

 

註: 各銀行申請信用卡都有一些條款及細則, 申請前必須仔細閱讀, 免致得不償失!

開心果曲奇

早前試過曲奇四重奏的開心果曲奇,

一試難忘, 食完又買, 一包$70, 只有20塊左右, 成$3個幾一塊, 好貴呀!

曲奇好脆, 重有開心果同朱古力碎, 雖然都幾熱氣, 不過好好味, 食到咳都抵!

同場加映阿MO瞓覺樣